Trayecto di Preparacion: FCCA Ta Guia Residentenan di Walishali pa Seguridad y Cooperacion den Nan Hogar Nobo.
Diamars atardi, dia 20 di juni 2023, nos ekipo di “woon- en wijkbeheer” di FCCA a organisa un trayecto di preparacion exitoso pa e residentenan di Walishali, Hato. E meta principal di e reunion aki, cual a tuma luga pafo di e compleho di nan apartamento, tabata pa garantisa cu cada residente tin e conocemento necesario pa disfruta di nan hogar nobo den un edificio di dos piso, y contribui na un ambiente ameno, limpi, y sigur.
Aunke algun residente ya a ricibi cierto informacion necesario tempo cu nan a muda den e edificio na 2022, tabata tin un necesidad pa organisa e trayecto informativo aki un biaha mas pa e residentenan cu a uni na e comunidad despues. Asina nos a haya e oportunidad perfecto pa no solamente actualisa e informacion suministra, pero tambe facilita un encuentro oficial entre tur e residentenan y asina fortalece e laso entre nan.
E trayecto di preparacon a cubri tur aspecto di bida den e apartamento nobo di dos piso di FCCA. Residentenan a ser presenta na e hefe di departamento di mantencion y reparacion, un colega encarga cu “incasso,” di nan huur, y a ricibi un introduccion oficial na e “beheerconsulent” di FCCA encarga cu e mantencion di e bienestar di nan apartamento y comunidad dentro di e compleho. Seguridad a keda enfatisa, cu Brandweer Aruba compartiendo informacion crucial riba prevencion di candela y protocolnan di emergencia.
E participacion y interaccion di e residentenan tabata excelente. Preguntanan a wordo contesta, preocupacionnan a wordo discuti, y solucionnan a wordo busca hunto. E ambiente tabata uno di cooperacion y compromiso pa un bario mas sigur y harmonioso.
FCCA ta sumamente agradecido pa e compromiso y participacion activo di tur e residentenan di Walishali den e trayecto di preparacion. Nos ta comprometi pa sigui inverti den iniciativanan manera esaki, y brinda tur e sosten necesario na nos residentenan.
Scroll To Top