Habitantenan di nos Barionan ta Organisa un Atardi di “SUMMER FUN” Pa e Muchanan na Sportcomplex Mabon.
Momentonan inolvidabel, caranan contento, y energia contagioso. E scenario aki a domina Sportcomplex Mabon diasabra, dia 8 di juli, unda aproximadamente 100 mucha di edad di 4 te 16 aña a uni hunto pa disfruta di un atardi yen di actividad y diberticion. Tur esaki tabata posibel danki na e dedicacion y esfuerso di dos boluntario extraordinario: Sra. Rosaria Brown, miho conoci como “Saya”, y Sra. Amalia Maduro, habitantenan di e barionan Village y Mabon.
Nos “beheerconsulenten” cu ta traha duru diariamente pa promove integracion comunitario den nos barionan, a apoya e habitantenan pa nan por realisa e evento aki. Nos di FCCA ta organisa eventonan manera esaki pa asina yuda stimula residentenan pa tuma iniciativa y contribui na nan propio bario. E meta ta pa fortifica e lasonan entre residentenan, promove participacion activo, y asina crea un ambiente saludabel y alegre pa tur.
Tur aña, nos ta organisa un actividad pa e muchanan durante vakantie grandi cu e proposito pa motiva e muchanan di diferente bario – manera Village, De Vuyst, Cura Cabai Zuid, Mabon y Weg Fontein pa interactua y disfruta di un dia alegre hunto. E biaha aki, nos “beheerconsulenten” a ofrece habitantenan e oportunidad pa organisa e evento pa nan propio bario, dunando nan tur e hermentnan necesario pa logra esaki. E habitantenan, hunto cu otro boluntarionan, a traha duro y a logra crea un evento memorabel y positivo pa tur presente.
Sportcomplex Mabon, cu recientemente a wordo haci limpi y drecha, tabata e sitio perfecto pa aloca e variedad di actividadnan pa e muchanan disfruta durante e evento. Tabata tin un huki di lectura, dibuho y wega, coordina door di Sra. Glenda di Biblioteca Nacional y Sra. Ethleen Phillips, diferente stacionnan di deporte manera kickball, basketball y futbol, organisa y guia door di IBiSA, coach Ivan, y coach Fecho di FC San Nicolas, demostracion di K9 door di KPA, y un “kids corner” cu dos Dino Jump pa e chikitinnan.
E muchanan tabata participa activamente den tur e stacionnan, compartiendo y disfrutando di nan experiencia hunto. Un meta adicional di e habitantenan cu a organisa e evento aki tabata pa reactiva e Sportcomplex na Mabon y motiva residentenan pa haci uso di e facilidadnan. E compleho deportivo a ricibi un capa nobo di verf y conexion electrico, cortesia di FFD. Nos kier a expresa un danki special na Sr. Pierre Croes di FFD y tur e boluntarionan cu a yuda haci e evento aki un exito, en particular Sra. Rosaria Brown y Amalia Maduro, pa nan tremendo trabou y dedicacion.
Scroll To Top