Nos FCCA y CEDE ARUBA ta Uni Forsa: Un Paso Grandi pa Desaroyo y Revitalisacion di nos Barionan
ORANJESTAD, diahuebs, 20 di juli – Nos hunto cu CEDE ARUBA, a firma un acuerdo di colaboracion cu lo dura pa cinco aña. E meta di e acuerdo aki ta pa fortalece e programanan existente den bario y mehora e servicio- y facilidadnan pa e residentenan. E firma di e acuerdo aki ta un paso grandi den e direccion corecto pa un futuro mas prospero pa nos barionan.
CEDE ARUBA, ta un organisacion di desaroyo y financiamiento ariba tereno social y desaroyo sostenibel, cu ta enfoca su energia y recursonan pa promove avance den nos comunidad Arubano. Recientemente, nan a lansa un plan ambicioso dedica na desaroyo di bario, den cual nan lo sostene organisacion y iniciativa di bario, y colaboracion entre instancianan. E proyecto aki, a ricibi apoyo di varios centro di bario y ayudo financiero di gobierno di Aruba y mas partner financiero.
Nos FCCA, na nos turno, ta dedica nos esfuerso riba solucionnan pa e falta di casnan social na Aruba. Nos meta ta pa tur famia Arubano, particularmente esnan cu ta enfrenta retonan grandi pa haya un cas, por conta cu un hogar. Pero nos vision ta bay mas leu; nos ta traha activamente pa mehora e calidad di bida den nos barionan, pa promove diversidad, y pa organisa actividadnan cu por enrikece e bida di nos residentenan.
Door di firma e acuerdo aki, tanto nos FCCA como CEDE ARUBA a planifica pa traha hunto riba varios iniciativa. Esakinan ta inclui financiamento di proyectonan den bario, desaroyo y mantencion di facilidadnan recreativo den barionan, y pa e comunidad en general. Nos ta buskando pa colabora cu otro organisacionnan cu tin e mesun vision, manera IBiSA, FFD, y varios NGO’s, y departamentonan di gobierno, cu e meta final pa contribui na mehoracion di calidad di bida y desaroyo di barionan mas sano, inclusivo y uni.
Esaki ta un paso grandi den e caminda pa creacion di un futuro mas prospero pa nos barionan y nos comunidad. E acuerdo entre nos FCCA y CEDE ARUBA no solamente ta refleha nos dedicacion y compromiso, pero tambe e potencial grandi pa cambio positivo.
Scroll To Top