Mobile Menu

Fundacion Cas Pa Comunidad Arubano

FCCA ta presenta logo completamente nobo y a anuncia “Smart Mortgage Event”.

FCCA ta presenta logo completamente nobo y a anuncia “Smart Mortgage Event”.

August 19, 2022

Diabierna atardi, dia 19 di augustus 2022 FCCA ta presenta logo completamente nobo y a anuncia “Smart Mortgage Event”.

Diabierna atardi, dia 19 di augustus 2022, FCCA a presenta un logo completamente nobo y a anuncia nan campaña pa “Smart Mortgage Event” cu ta start den luna di september proximo.

Durante e reciente temporada FCCA a conoce hopi cambionan interno na unda a centralisa nan oficinanan y a haci cambionan necesario pa bai cu e tempo y nan clientenan y a yega momento pa refleha esaki den imagen pa publico door di e desvelo di un logo nobo.

Sra. Julie Wever Director Tecnico y Comercial di FCCA a hiba palabra na ocasion di e presentacion di e logo nobo di FCCA pa miembronan di prensa, stakeholders y invitadonan.

Sra. Wever a expresa di ta hopi satisfecho di mira con e cambionan interno a tuma lugar pa centralisa e institucion FCCA cu metanan nobo. “Nos a cambia nos manera di traha completamente den e sentido cu ta enfoca mas riba e cliente y kico tur e cliente mester pa nos por traha mihor pa topa cu nan expectativanan”, segun Wever.

E slogan cu FCCA ta trahando cu ne ta: “Nos ta t’ey pa yuda bo”, Wever ta enfatisa.

Wever: “Nos ta traha cu nos historia y balornan pa bin cu maneranan nobo y cu ta funciona cu e comunidad di Aruba. Pa e motibo aki tambe a considera loke ta tipico di e casnan Arubano den e diseño di nos logo nobo.”

E team di FCCA a scoge un logo cu ta basa riba tegelnan di vloer autentico usa na Aruba y Caribe cu e colornan geel y blauw. E color geel tambe ta refleha e elementonan den nos naturalesa manera flornan di kibrahacha, nos barica geel y solo di Aruba. E blauwnan licht y donker ta refleha e diferente colornan blauw di nos lama.

E icono di e logo a cambia tambe den uno sumamente actualiza y ta representa e “emprenta” di un bloki cu ta usa pa traha un cas, visualizando tambe diseño di 4 dak di cas uni na otro den simbolismo di comunidad. Tur e elementonan aki ta refleha FCCA su presencia den comunidad ya pa mas di 40 aña, nos ta un fondo solido y autentico.

“Despues di awe, na mes momento cu nos ta desvela e logo nobo aki, e proceso di re-branding di FCCA ta cuminsa. Nos website y pagina di Facebook y tur otro medio di comunicacion lo tin nos identidad nobo. Esaki ta inclui e edificio y vehiculonan di FCCA pa henter Aruba por wak!”, asina Julie Wever a bisa yen di entusiasmo.

Julie Wever a haci uso di e oportunidad di invita un y tur na e evento di “Smart Mortgage Event” cu lo tuma lugar dia 3 di september 2022, di 10 am te cu 7 pm na unda por haya sa mas di loke nan ta ofrece. Minister President di Aruba, Sra. Evelyn Wever Croes tabata presente y a hiba palabra tambe na e ocasion aki na unda cu ela elogia e manera di maneho cu FCCA ta hibando cu ta alinea cu sostenibilidad y cu a tene cuenta cu e crecemento di e pueblo cu ta uno multi-cultural. Presente na e ocasion aki tambe tabata Minister di Asuntonan Economico, Communicacion y Desaroyo Sostenibel, Geoffrey Wever.

Scroll To Top