Presentando Nos Funcionario Nobo di Mercadeo & Comunicacion di FCCA: Tumando Paso Pa Trece Nos Compania Mas Cerca di Pueblo.
Diaranson mainta, dia 14 di juni 2023, nos Director Tecnico y Comercial, Julie Wever, a anuncia cu recientemente nos a apunta Jessica van Montfoort-Posner como Funcionario di Mercadeo y Comunicacion.
Julie a expresa cu e operacionnan di FCCA ta bay mas leu cu simplemente brinda cas, enfatisando cu comunicacion efectivo ta esencial den establece y mantene relacionnan fuerte cu nos cliente y comunidad. Nos ta sigui traha ariba mehoracion di nos servicio. Ultimo nos a mehora nos producto di hipoteca cu un interes mas abou y tambe nos ta den proceso di mehoracion di nos barionan pa por brinda nos cliente mas calidad di bida. Aña pasa nos a pone e prome piedra pa inicia e proceso di “re-branding” di FCCA y e creacion di e funcion nobo aki di Mercadeo & Comunicacion ta un paso integral den e transformacion aki. Julie: “Comunicacion ta hopi importante pa FCCA, nos kier ta mas cerca di nos comunidad.”
Despues Julie a pasa e palabra pa Jessica, kende a introduci su mes y comparti un poco mas di su experiencia amplio den Mercadeo, Comunicacion, y Public Relations. Jessica: “Despues di a ricibi mi “bachelor degree” den comunicacion na Hulanda, mi a traha na diferente companianan comercial, prome cu mi a bin bek Aruba, na unda mi a traha casi nuebe aña na Royal Aruba Aloe,” Jessica a splica. Pa duna algun ehemplo, El a comparti cu el a participa den varios proyecto, cual tabata dedica na e mehoracion di bentanan di un compania, organisa rueda di prensa y campañanan di mercadeo digital.
“Mi ta entusiasma pa uza mi experiencia pa fortalece e imagen di FCCA riba mercado y informa pueblo di e diferente servicionan cu nos compania ta ofrece. Mi ta hopi honra pa por forma parti di nos team. FCCA ta mas cu un compania di cas, e ta un organisacion cu ta yuda fortalece e bienestar di nos comunidad y nos pais door di su proposito pa ofrece cada persona cu tin mester di un cas, un hogar. Mi ta orguyoso pa forma parti di e mision aki,” Jessica a remarca.
Cu Jessica van Montfoort-Posner liderando e strategia di comunicacion di FCCA, nos organisacion ta cuminsa un capitulo nobo. Su experticio ta spera pa mehora presencia di FCCA no solamente como un proveedor di cas y servicionan financiero, pero tambe como un pilar vital den nos comunidad.
Scroll To Top