| Cas entrega na Fundacion Adopt an Addict | | Print | |
|
Diarazon atardi 28 di april 2010 Fundacion Cas pa Comunidad Arubano
(FCCA) a organisa un evenemento pa duna muestra di entrega di un cas
situa na Moko. E cas a wordo entrega na e Stichting Adopt an Addict. E
acto aki a wordo efectua de presencia di sra. Audrey Laclé, directornan
di FCCA y diferente mantario y invitadonan. Stichting Adopt an Addict a
aserca FCCA cu e peticion pa haya un cas pa asina e fundacion por
ofrece nan clientenan cu ta regresa for di e terapia di rehabilitacion
un espacio pa por sigui cu e terapia di reintegracion. FCCA a cumpra e cas aki na Moko y a dicidi pa renova y adapta esaki pa por cumpli cu e peticionan di Stichting A@A. E cas ta consisti di cinco dormitorio, dos baño, un sala grandi, un comedor, un porch dilanti y un terasa riba e piso . Aparte e cas tin un espacio riba e piso cu a wordo converti den un oficina pa e fundacion por hasi su trabounan administrativo. Pues e fundacion awor ta conta cu espacio amplio pa nan por cumpli cu parti di nan meta. E inversion total di e proyecto ta suma na tres shen y cincuenta mil florin Arubano. Mision di FCCA ta: FCCA ta ofrece casnan adecuado y pagabel na esnan cu ta buscando vivienda, den barionan sigur y bon cuida. FCCA cumpliendo cu e mision aki ya pa algun aña caba, aparte di ta construi casnan pa e grupo social den nos comunidad y tambe ofreciendo esnan cu mas entrada e oportunidad pa construi of cumpra un propio cas via fiansa hipotecario, tambe ta dunando atencion riba e tereno di vivienda na diferente gruponan special den nos comunidad. Den pasado a percura pa vivienda pa e.o Stichting Ambiente Feliz, SVGA, Fundacion Biba bou Guia, Stichting Thuiszorg Aruba. Tambe a duna oportunidad na personanan mas grandi cu ainda por biba independiente vivienda mas chiquito. Pues riba diferente frente FCCA ta ocupa su mes pa asina facilita e comunidad Arubano cu vivienda. Minister di Salud y Deporte dr. Richard Visser hunto cu Presidente di Stichting A@A sra. Audrey Laclé a desvela e borchi di e logo di e Stichting y a recibi e e yabinan for di directornan di FCCA, sr. Peter van Poppel y sra. Maria Chriostina Laclé. Desde ayera caba e stichting ta ocupando e cas. |
